ସୀମାରେ ଧରାପଡିଲେ ୫ ବାଂଲାଦେଶୀ; ଲୁଚିଛପି ଭାରତ ଆସୁଥିଲେ

@khantiodianews-: ଭାରତୀୟ ସୀମା ସୁରକ୍ଷା ବାହିନୀ ଯବାନମାନେ ଭାରତ-ବାଂଲାଦେଶ ସୀମାନ୍ତରୁ ୫ ଜଣ ବାଂଲାଦେଶୀ ନାଗରିକଙ୍କୁ ଗିରଫ କରିଛନ୍ତି। ସେମାନଙ୍କ ମଧ୍ୟରେ ଚାରିଜଣ ମହିଳା ଓ ଜଣେ ପୁରୁଷ ଅଛନ୍ତି। ଏହି ବାଂଲାଦେଶୀ ନାଗରିକମାନେ ଲୁଚିଛପି ସୀମା ଡେଇଁ ଭାରତ ଆସିବାକୁ ଉଦ୍ୟମ କରୁଥିଲେ। ବିଏସଏଫ ସୂତ୍ରରୁ ପ୍ରକାଶ ଯେ ଧରାପଡିଥିବା ଏହି ବାଂଲାଦେଶୀ ନାଗରିକମାନେ ବାଂଲାଦେଶର ଜେସୋର ଏବଂ ନାରାଲି ଜିଲାର ବାସିନ୍ଦା। ବିଏସଏଫର ୦୮ ବାଟାଲିଅନର ମହେନ୍ଦ୍ର ଆଉଟପୋଷ୍ଟରେ ମୁତୟନ ଯବାନମାନେ ପାଟ୍ରୋଲିଂ କରୁଥିବାବେଳେ ଉକ୍ତ ବାଂଲାଦେଶୀ ନାଗରିକଙ୍କୁ ଏକ କଦଳୀ ବଗିଚା ମଧ୍ୟରେ ଲୁଚି ରହିଥିବା ଦେଖିବାକୁ ପାଇଥିଲେ। ସେମାନଙ୍କୁ ଗିରଫ କରାଯାଇ ଆଉଟପୋଷ୍ଟକୁ ଅଣାଯାଇଥିଲା। ଯବାନମାନେ ସେମାନଙ୍କୁ ପଚରା ଉଚରା କରିବାପରେ ସେମାନେ ଭାରତକୁ ଅନେକ ଥର ଏହିଭଳି ଆସିଥିବା କହିଛନ୍ତି। ଗିରଫ ବାଂଲାଦେଶୀମାନେ ଏହା ମଧ୍ୟ ସୂଚନା ଦେଇଛନ୍ତି ଯେ ସେମାନେ ମୁମ୍ବଇରେ ବିଭିନ୍ନ ସ୍ଥାନରେ କାମ କରୁଥିଲେ। ସୀମା ଅତିକ୍ରମ କରିବାକୁ ସେମାନଙ୍କ ମଧ୍ୟରୁ ପ୍ରତ୍ୟେକ ଭାରତର ଜଣେ ଦଲାଲ ହାଫିଜୁଲକୁ ୧୦ରୁ ୧୨ ହଜାର ଟଙ୍କା ଦେଇଥିବା ମଧ୍ୟ କହିଛନ୍ତି। ଗିରଫ ବାଂଲାଦେଶୀ ନାଗରିକଙ୍କୁ ଅଧିକ ତଦନ୍ତ ନିମନ୍ତେ ଉତ୍ତର ୨୪ ପ୍ରଗଣା ଜିଲାର ହଂସଖାଲିସ୍ଥିତ ପଶ୍ଚିମବଙ୍ଗ ପୁଲିସ ଅଧିକାରୀଙ୍କୁ ହସ୍ତାନ୍ତର କରାଯାଇଛି।