ଏକ ପୃଥିବୀ ଏକ ସ୍ୱାସ୍ଥ୍ୟର ବାର୍ତା ସମଗ୍ର ବିଶ୍ୱରେ ପହଞ୍ଚିବା ଆବଶ୍ୟକ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
ଜି-୭ ଶିଖର ବୈଠକର ପ୍ରଥମ ଆଉଟରିଚ୍ ଅଧିବେଶନରେ ପ୍ରଧାନମନ୍ତ୍ରୀଙ୍କ ଉଦବୋଧନ
ଭବିଷ୍ୟତର ଯେକୌଣସି ମହାମାରୀର ମୁକାବିଲା ନିମନ୍ତେ ବିଶ୍ୱ ଏକତା, ନେତୃତ୍ୱ ଓ ସମର୍ଥନ ପାଇଁ ଆହ୍ୱାନ କରିବା ସହ ଗଣତାନ୍ତ୍ରିକ ଏବଂ ପାରଦର୍ଶୀ ସମାଜଗୁଡିକର ଏହି ଲକ୍ଷ୍ୟ ହାସଲରେ ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ଶନିବାର ଜି-୭ ଶିଖର ବୈଠକର ପ୍ରଥମ ଆଉଟରିଚ୍ ଅଧିବେଶନରେ ଉଦବୋଧନ ଦେଇ ଶ୍ରୀ ମୋଦୀ ଏକ ପୃଥିବୀ ଏକ ସ୍ୱାସ୍ଥ୍ୟର ମନ୍ତ୍ର ସମଗ୍ର ବିଶ୍ୱରେ ପହଞ୍ଚିବା ଆବଶ୍ୟକ ବୋଲି କହିଛନ୍ତି। ବିଶ୍ୱ ସ୍ୱାସ୍ଥ୍ୟ ପ୍ରଶାସନରେ ସଂସ୍କାରର ଆବଶ୍ୟକତା ନିମନ୍ତେ ଭାରତର ପ୍ରତିଶୃତିବଦ୍ଧତାକୁ ମଧ୍ୟ ପ୍ରଧାନମନ୍ତ୍ରୀ ଦୋହରାଇଛନ୍ତି।
କୋଭିଡ ମହାମାରୀର ଦ୍ୱିତୀୟ ଲହର ବିରୁଦ୍ଧରେ ଭାରତ ଯେଉଁ ସଂଗ୍ରାମ ଜାରି ରଖିଛି ସେଥିରେ ସହଯୋଗର ହାତ ବଢ଼ାଇଥିବାରୁ ପ୍ରଧାନମନ୍ତ୍ରୀ ଜି-୭ ସଦସ୍ୟ ରାଷ୍ଟ୍ର ଓ ଅନ୍ୟ ମିତ୍ରରାଷ୍ଟ୍ରମାନଙ୍କୁ ଧନ୍ୟବାଦ ଜଣାଇଛନ୍ତି। ବିଶ୍ୱ ବାଣିଜ୍ୟ ସଂଗଠନ ଡବ୍ଲୁଟିଓରେ ଭାରତ ଓ ଦକ୍ଷିଣ ଆଫ୍ରିକା ପକ୍ଷରୁ କୋଭିଡ ସମ୍ବନ୍ଧିତ ଜ୍ଞାନକୌଶଳ ହସ୍ତାନ୍ତରଣ ଉପରୁ କଟକଣା ହଟାଇବା ପାଇଁ ଦିଆଯାଇଥିବା ପ୍ରସ୍ତାବକୁ ସମର୍ଥନ କରିବା ସକାଶେ ପ୍ରଧାନମନ୍ତ୍ରୀ ଏହି ଅବସରରେ ଜି-୭ ରାଷ୍ଟ୍ରଗୁଡିକୁ ଆହ୍ୱାନ କରିଛନ୍ତି। ପ୍ରଧାନମନ୍ତ୍ରୀ ଆଜି ଜି-୭ ଶିଖର ବୈଠକର ଅନ୍ତିମ ଦିବସରେ ଯୋଗ ଦେଇ ଦୁଇଟି ଅଧିବେଶନରେ ଉଦବୋଧନ ଦେବେ।
